Norvegjia dhe Anglia do të përballen në orën 23:00 për një biletë në gjysmëfinalen e Kupës së Botës 2026, në një sfidë që premton spektakël mes dy skuadrave në formë.
Norvegjezët shkruan historinë në fazën e 1/8-ave, duke eliminuar Brazilin dhe duke siguruar për herë të parë kualifikimin në çerekfinalet e një turneu madhor. Skuadra e drejtuar nga Ståle Solbakken synon të vazhdojë surprizën, edhe pse statistikat nuk janë në favorin e saj përballë kundërshtarëve evropianë në Botëror.
Në anën tjetër, Anglia e Thomas Tuchel vjen pas një fitoreje dramatike 3-2 ndaj Meksikës, një ndeshje ku “Tre Luanët” triumfuan pavarësisht se luajtën për një pjesë të madhe të takimit me një lojtar më pak.
Historikisht, Anglia ka epërsi të dukshme në përballjet direkte, me shtatë fitore në 12 ndeshjet e fundit ndaj Norvegjisë dhe katër ndeshje radhazi pa pësuar gol.
Vëmendja do të jetë te dueli mes dy yjeve të mëdhenj. Erling Haaland po kalon një formë të jashtëzakonshme, pasi ka shënuar në 14 ndeshjet e fundit zyrtare me kombëtaren, ndërsa Jude Bellingham vjen pas dy golave ndaj Meksikës dhe është bërë mesfushori i parë anglez që realizon katër gola në një edicion të Kupës së Botës.
Sa i përket mungesave, Norvegjia është në pritje të gjendjes së David Møller Wolfe, ndërsa Anglia nuk do të ketë në dispozicion Jarell Quansah, i pezulluar pas kartonit të kuq, si dhe Jordan Henderson, i cili ka pësuar një dëmtim në dorë.
Fituesi i kësaj përballjeje do të sigurojë një vend në gjysmëfinalen e Botërorit 2026 dhe do të jetë një hap larg finales së madhe.
