Një aksident i rëndë rrugor është regjistruar mbrëmjen e kaluar në zonën e Fanit, në Mirditë, ku janë plagosur gjashtë të mitur, të gjithë kushërinj me njëri-tjetrin.
Sipas informacioneve paraprake, automjeti drejtohej nga një 16-vjeçar, i cili dyshohet se kishte marrë makinën dhe, për shkaqe që ende po hetohen, humbi kontrollin e mjetit duke u përplasur me një shtyllë ndriçimi.
Si pasojë e përplasjes, të gjashtë të miturit mbetën të plagosur. Burimet paraprake bëjnë me dije se një vajzë 12-vjeçare ka pësuar thyerje të legenit, ndërsa dy të mitur të tjerë kanë marrë fraktura në duar dhe këmbë. Katër fëmijët e tjerë kanë pësuar dëmtime të ndryshme.
Të plagosurit morën ndihmën e parë mjekësore dhe më pas u transportuan drejt spitaleve në Tiranë për trajtim më të specializuar. Për transportimin e tyre u angazhuan gjashtë autoambulanca.
Në vendngjarje mbërritën shërbimet e Policisë dhe grupi hetimor, të cilët kanë nisur hetimet për të zbardhur shkaqet dhe rrethanat e plota të aksidentit.
