Franca ka siguruar një vend në gjysmëfinalen e Kupës së Botës, pasi mposhti Marokun me rezultatin 2-0 në çerekfinalen e zhvilluar në Foxborough.
Skuadra e Didier Deschamps e nisi takimin me ritëm të lartë, duke krijuar raste të rrezikshme që në minutat e para, por portieri maroken Bono reagoi në mënyrë spektakolare ndaj goditjeve të Kylian Mbappé dhe Dayot Upamecano.
Momenti më i rëndësishëm i pjesës së parë erdhi kur Mbappé fitoi një penallti pas ndërhyrjes së Noussair Mazraoui. Sulmuesi francez mori përsipër ekzekutimin, por Bono priti goditjen, duke mbajtur të paprekur portën e Marokut deri në pushim. Pak para përfundimit të pjesës së parë, Lucas Digne goditi edhe traversën.
Në pjesën e dytë, Franca vazhdoi presionin dhe në minutën e 60-të Mbappé gjeti rrugën e rrjetës me një goditje të bukur nga jashtë zonës, duke kaluar në avantazh kampionët e botës. Ky ishte goli i tij i 20-të në historinë e Kupës së Botës.
Vetëm pak minuta më vonë, Ousmane Dembélé vulosi kualifikimin, duke shënuar golin e dytë pas një aksioni të shpejtë ofensiv.
Maroku tentoi të rikthehej në lojë në minutat e fundit, por mbrojtja franceze dhe portieri Mike Maignan administruan me qetësi avantazhin, duke regjistruar ndeshjen e tretë radhazi pa pësuar gol.
Me këtë fitore, Franca siguron një vend në gjysmëfinale, ku do të përballet me fituesin e çiftit Spanjë–Belgjikë, ndërsa vijon rrugëtimin në kërkim të një finaleje të tretë radhazi në Kupën e Botës.
