Policia ka parandaluar një ngjarje të dyshuar kriminale për motive hakmarrjeje në Kurbin, në kuadër të operacionit të koduar “Argos”. Në pranga ka rënë 37-vjeçari Emanuel Gehard, alias Basha, alias Lika, vëllai i 40-vjeçarit I. Gj., i cili u ekzekutua më 9 korrik 2026.
Sipas Policisë, 37-vjeçari u arrestua në Fushë Milot, teksa lëvizte me një automjet tip “Mercedes-Benz ML”, të blinduar dhe me targa gjermane.
Gjatë kontrollit fizik, atij iu gjet një armë zjarri automatike e tipit “Skorpion”, së bashku me një krehër me 16 fishekë luftarakë. Automjeti dhe arma u sekuestruan në cilësinë e provës materiale.
Sipas autoriteteve, ndërhyrja u krye pas monitorimit të situatës kriminale në qark dhe analizimit të ngjarjeve të mëparshme. Dyshohet se ngjarja e mundshme kriminale lidhej me hakmarrjen për vrasjen e 40-vjeçarit në Kurbin.
Operacioni “Argos” u finalizua nga specialistët e Sektorit për Hetimin e Krimeve të Rënda, në bashkëpunim me specialistët e Seksionit Operacional të Hetimit dhe shërbimet e Komisariatit të Policisë Kurbin.
Ndërkohë, vijojnë hetimet për identifikimin dhe kapjen e autorit të vrasjes së 40-vjeçarit, si dhe për dokumentimin e plotë të rrethanave të ngjarjes. Materialet procedurale i janë referuar Prokurorisë për veprime të mëtejshme.
Njoftimi i plotë i Policisë së Lezhës
DVP Lezhë/Inteligjenca kriminale parandalon një tjetër vrasje, dyshohet për hakmarrje për vrasjen e shtetasit I. Gj., 40 vjeç, kryer më datë 9 korrik, në Kurbin.
Finalizohet operacioni i koduar “Argos”.
Lëvizte i armatosur dhe me automjet të blinduar, me targa gjermane, arrestohet në Fushë Milot, vëllai i 40-vjeçarit.
I arrestuari, shtetas me precedent kriminal.
Sekuestrohen 1 armë zjarri automatike tip “Skorpion” municion luftarak dhe automjeti tip “Mercedes-Benz ML”.
Si rezultat i monitorimit permanent të situatës në qark, nëpërmjet punës intensive operative dhe kontrolleve, si dhe si rezultat i analizimit dhe ndjekjes në dinamikë të ngjarjeve kriminale të ndodhura më parë, me qëllim parandalimin e ngjarjeve të lidhura me to dhe parandalimin e krimeve në përgjithësi, specialisët e Sektorit për Hetimin e Krimeve të Rënda, në bashkëpunim me specialistët e Seksionit Operacional të Hetimit dhe me shërbimet e Komisariatit të Policisë Kurbin, finalizuan operacionin e koduar “Argos”.
Në kuadër të operacionit u parandalua një vrasje, dyshohet për hakmarrje në lidhje me vrasjen e shtetasit I. Gj. alias I. L. alias I. K. alias I. N., 40 vjeç, kryer më datë 09.07.2026, në Kurbin.
Po në kuadër të operacionit u arrestua shtetasi E.(G.) B.(L.), 37 vjeç, banues në Kurbin, me precedent për përfshirje në ngjarje kriminale të mëparshme (vëllai i 40-vjeçarit)
Automjeti tip “Mercedes-Benz ML”, i blinduar dhe me targa gjermane, që drejtonte 37-vjeçari, u ndalua në Fushë Milot. Gjatë kontrollit fizik, 37-vjeçarit iu gjet 1 armë zjarri automatike tip “Skorpion” me një krehër me 16 fishekë.
Vijojnë intensivisht hetimet dhe puna policore, për kapjen e autorit të vrasjes së 40-vjeçarit, si dhe për dokumentimin e rrethanave të saj.
Materialet procedurale iu referuan Prokurorisë, për veprime të mëtejshme.
