Prokuroria e Fierit ka përfunduar hetimet për vrasjen e 56-vjeçarit Anesti Rama, ngjarje e ndodhur më 23 korrik 2025 në fshatin Frashër të Patosit. Në përfundim të hetimeve, çështja është dërguar për gjykim, ndërsa të pandehura janë vajza e viktimës, Ermalinda Rama, dhe bashkëshortja e tij, Valbona Rama.
Ermalinda Rama, 26 vjeçe në kohën e ngjarjes, akuzohet për veprën penale “Vrasja për shkak të marrëdhënieve familjare”, ndërsa nëna e saj, Valbona Rama, akuzohet për “Veprime që pengojnë zbulimin e së vërtetës”.
Sipas hetimeve të Prokurorisë, ngjarja ndodhi në banesën e familjes, ku e reja dyshohet se i shtrëngoi të atit qafën me një lak teli, duke i shkaktuar asfiksi dhe vdekjen.
Pas ngjarjes, Valbona Rama dyshohet se ka pastruar ambientin ku u gjet trupi i viktimës, si dhe ka larë trupin e tij, me qëllim ndryshimin ose fshehjen e gjurmëve që mund të ndihmonin në zbardhjen e krimit.
Ngjarja u regjistrua rreth orës 23:00 të 23 korrikut 2025, në fshatin Frashër të Patosit. Sipas njoftimit të Policisë pas ngjarjes, Ermalinda Rama kishte raportuar se babai i saj kishte humbur jetën në rrethana aksidentale.
Megjithatë, dyshimet e ngritura gjatë veprimeve të para hetimore çuan në kryerjen e verifikimeve të mëtejshme për të përcaktuar shkakun e vdekjes dhe rrethanat e ngjarjes.
Hetimet e zhvilluara nga specialistët e Seksionit për Hetimin e Krimeve të Rënda në Drejtorinë Vendore të Policisë Fier, në bashkëpunim me Prokurorinë, çuan në dyshimet se 56-vjeçari ishte vrarë me mbytje me tel.
Në atë kohë, Policia bëri të ditur se e reja kishte pranuar autorësinë e krimit, ndërsa nëna e saj u hetua për rolin e dyshuar në veprimet e kryera pas vrasjes.
Në përfundim të hetimeve, Prokuroria ka marrë në konsideratë deklarimet e administruara, rezultatet e ekspertimit mjekoligjor, këqyrjen e vendit të ngjarjes, sendet e sekuestruara dhe provat e tjera të mbledhura gjatë hetimit.
Në bazë të materialeve të administruara, organi i akuzës ka arritur në përfundimin se Ermalinda Rama dyshohet se ka kryer veprimet që i shkaktuan vdekjen të atit, ndërsa Valbona Rama dyshohet se ka ndërhyrë për të penguar zbulimin e së vërtetës.
Ermalinda Rama akuzohet sipas nenit 79/a të Kodit Penal për vrasje për shkak të marrëdhënieve familjare, ndërsa Valbona Rama sipas nenit 301 për veprime që pengojnë zbulimin e së vërtetës.
Me dërgimin e çështjes në gjykatë, do të jetë kjo e fundit që do të shqyrtojë provat dhe do të vendosë mbi përgjegjësinë penale të dy të pandehurave. Të dyja prezumohen të pafajshme deri në marrjen e një vendimi gjyqësor të formës së prerë.
