Zyrtarë të Shteteve të Bashkuara dhe Iranit po zhvillojnë bisedime indirekte në Doha të Katarit, në një përpjekje për të konsoliduar marrëveshjen e përkohshme mes dy vendeve dhe për të shmangur një përshkallëzim të ri të tensioneve në Lindjen e Mesme.
Sipas burimeve diplomatike, takimet po zhvillohen në nivel teknik dhe me ndërmjetësimin e Katarit dhe Pakistanit, ndërsa nuk janë planifikuar kontakte të drejtpërdrejta mes delegacioneve amerikane dhe iraniane.
Paralelisht, zëvendësministri i Jashtëm i Iranit, Kazem Gharibabadi, është takuar me kryeministrin e Katarit për të diskutuar hapat drejt formalizimit të marrëveshjes së përkohshme mes Uashingtonit dhe Teheranit. Katari vijon të luajë një rol kyç si ndërmjetës në dialogun mes palëve.
Zhvillimet diplomatike kanë ndikuar edhe në tregjet ndërkombëtare. Çmimi i naftës Brent ka vijuar rënien, ndërsa analistët vlerësojnë se investitorët po e konsiderojnë armëpushimin mes SHBA-së dhe Iranit si një marrëveshje me perspektivë afatgjatë, çka ka ulur frikën për ndërprerje të furnizimeve në ngushticën strategjike të Hormuzit.
Ndërkohë, Omani ka propozuar vendosjen e tarifave për anijet që kalojnë në Ngushticën e Hormuzit, duke marrë si model sistemin e përdorur në ngushticat e Malakës dhe Singaporit. Megjithatë, ekspertët e transportit detar shprehen skeptikë për zbatimin e një skeme të tillë, duke argumentuar se Hormuzi ka karakteristika të ndryshme dhe se një nismë e tillë do të kërkonte mbështetjen e vendeve që e përdorin këtë korridor detar.
Pavarësisht mungesës së një marrëveshjeje përfundimtare, rifillimi i kontakteve diplomatike shihet si një sinjal pozitiv për uljen e tensioneve dhe stabilitetin në rajon.
