Një ngjarje e rëndë kriminale tronditi pasditen e sotme qytetin e Korçës, ku 20-vjeçari Johan Zuko, ish-pjesëtar i Forcave të Armatosura, humbi jetën pasi u qëllua me armë zjarri.
Ngjarja ndodhi rreth orës 16:30 në rrugën “Viktor Eftimiu”, në lagjen nr. 15, pas një konflikti mes disa personave. Sipas informacionit paraprak të Policisë, konflikti ka qenë i mbartur prej disa kohësh dhe më pas ka përshkallëzuar deri në përdorimin e armës.
Zv.drejtori i Hetimit të Krimeve, Sejfulla Metko, bëri të ditur se viktima dhe autori i dyshuar kanë qenë shokë që në fëmijëri, ndërsa mes tyre kishte pasur një konflikt të hershëm.
Sipas hetuesve, 20-vjeçari është qëlluar me kallashnikov, ndërsa në dorën e tij është gjetur edhe një thikë. Autoritetet po hetojnë dinamikën e plotë të konfliktit dhe rrethanat që çuan në përshkallëzimin e tij.
Pas të shtënave, autori i dyshuar është larguar nga vendngjarja. Policia ka mundur ta identifikojë dhe është vënë në ndjekje të tij, ndërsa kontrollet janë përqendruar edhe në drejtim të zonës së varrezave, ku dyshohet se është parë duke u larguar nga dëshmitarë.
Ndërkohë, tre persona të dyshuar si të përfshirë në konflikt janë shoqëruar në Komisariat, ku po kryhen veprimet procedurale.
Grupi hetimor, nën drejtimin e Prokurorisë, vijon punën për dokumentimin e plotë të ngjarjes, përcaktimin e rolit të secilit prej personave të përfshirë dhe kapjen e autorit të dyshuar.
Hetimet pritet të hedhin më shumë dritë edhe mbi motivin e konfliktit të hershëm mes viktimës dhe autorit.
