Portugalia dhe Zvicra kanë siguruar një vend në fazën e 1/8-ave të Kupës së Botës 2026, pas fitoreve të rëndësishme ndaj Kroacisë dhe Algjerisë në ndeshjet e fazës së 1/16-ave.
Portugalia triumfoi me rezultatin 2-1 ndaj Kroacisë në një përballje dramatike të zhvilluar në Toronto. Edhe pse kroatët kaluan të parët në avantazh me Ivan Perišić, luzitanët reaguan në pjesën e dytë. Cristiano Ronaldo barazoi shifrat nga pika e bardhë e penalltisë, ndërsa Gonçalo Ramos realizoi golin e fitores në minutat shtesë, duke vulosur kualifikimin.
Me këtë sukses, Portugalia do të përballet në fazën tjetër me rivalët iberikë të Spanjës, në një nga sfidat më të forta të këtij Botërori.
Edhe Zvicra vazhdoi rrugëtimin e saj, duke mposhtur 2-0 Algjerinë. Breel Embolo zhbllokoi rezultatin në minutat e para të takimit, ndërsa Dan Ndoye vulosi fitoren menjëherë pas fillimit të pjesës së dytë.
Skuadra zvicerane dominoi ndeshjen dhe administroi me qetësi avantazhin deri në fund, duke siguruar një kualifikim të merituar. Në fazën e 1/8-ave, Zvicra do të përballet me fituesin e çiftit Kolumbi – Ganë.
Me këto rezultate, tabloja e fazës me eliminim direkt në Kupën e Botës 2026 bëhet gjithnjë e më interesante, ndërsa ekipet favorite vijojnë garën për trofeun më të rëndësishëm të futbollit botëror.
