Presidenti i Shteteve të Bashkuara, Donald Trump, ka deklaruar se negociatat me Iranin po ecin në drejtimin e duhur, duke pohuar se Teherani ka rënë dakord për “pothuajse gjithçka” që kërkon Uashingtoni.
Në një intervistë për CNBC, Trump theksoi se prioriteti i administratës së tij mbetet parandalimi i zhvillimit të armëve bërthamore nga Irani dhe jo rrëzimi i regjimit.
“Unë nuk po kërkoj ndryshim regjimi. Irani nuk mund të ketë armë bërthamore”, u shpreh presidenti amerikan.
Trump deklaroi gjithashtu se kapacitetet ushtarake të Iranit janë dëmtuar rëndë, duke shtuar se vendi është “shuar plotësisht ushtarakisht”, edhe pse sipas tij disponon ende disa raketa që mund të neutralizohen.
Gjatë intervistës, kreu i Shtëpisë së Bardhë e cilësoi Iranin si “ngacmuesin e Lindjes së Mesme”, duke shtuar se vendit do t’i duhet kohë për t’u përshtatur me presionin e ushtruar nga SHBA.
Deklaratat e Trump vijnë në një moment kur në Katar kanë nisur bisedimet për një marrëveshje të re mes SHBA-së dhe Iranit. Raundi i ardhshëm i negociatave pritet të zhvillohet pas ceremonisë mortore të ish-udhëheqësit suprem iranian, Ajatollah Ali Khamenei.
Ndërkohë, administrata amerikane është përballur me kritika lidhur me ndikimin që pati mbyllja e Ngushticës së Hormuzit në tregjet ndërkombëtare të energjisë, një zhvillim që rriti presionin për rikthimin e palëve në tryezën e negociatave.
