Një aksident i rëndë rrugor është regjistruar pasditen e kësaj të marte në qytetin e Durrësit, në zonën e Ish-Kënetës, përgjatë rrugës “Azem Hajdari”.
Sipas informacioneve paraprake, dy automjete janë përfshirë në një përplasje të fortë, ndërsa dyshohet se të dy mjetet po lëviznin me shpejtësi në momentin e aksidentit. Për të shmangur një përplasje frontale, njëri prej drejtuesve ka tentuar të devijojë drejtimin, por manovra nuk ka shmangur dot aksidentin.
Si pasojë e goditjes, njëri nga automjetet ka dalë nga rruga dhe ka përfunduar në një kanal anësor, duke pësuar dëme të konsiderueshme materiale.
Nga aksidenti ka mbetur i plagosur drejtuesi i automjetit që doli nga rruga. Ai është transportuar me urgjencë drejt Spitalit Rajonal të Durrësit, ku po merr ndihmën mjekësore. Burime paraprake bëjnë me dije se gjendja e tij shëndetësore paraqitet e rëndë.
Pas ngjarjes, në vendngjarje kanë mbërritur shërbimet e Policisë dhe grupi hetimor, të cilët po punojnë për dokumentimin e plotë të aksidentit dhe përcaktimin e shkaqeve që çuan në përplasjen e dy automjeteve.
