Prokuroria e Tiranës ka përfunduar hetimet dhe ka dërguar në gjyq tre persona, të dyshuar për përfshirje në një skemë mashtrimi përmes një “Call Center”-i, ku në shënjestër ishin shtetas të huaj.
Sipas dosjes së Prokurorisë, K.S dhe F.K akuzohen për veprën penale “Mashtrimi kompjuterik”, ndërsa E.A për “Moskallëzim krimi”.
Hetimi nisi pas informacioneve të siguruara në rrugë operative për një ambient në rrugën “Zalli”, në zonën e Selitës në Tiranë, ku dyshohej se ushtrohej aktivitet i paligjshëm “Call Center”.
Gjatë kontrollit të ushtruar më 10 nëntor 2025, në ambient u gjetën disa persona në poste pune të përshtatura si zyra, ndërsa u sekuestruan 9 njësi qendrore kompjuterike, 2 laptopë, 2 telefona celularë dhe dokumente të tjera.
Si funksiononte skema?
Sipas hetimeve, punonjësit kontaktonin shtetas të huaj dhe u premtonin se mund t’u rikthenin paratë që kishin humbur më parë në investime apo skema mashtruese online. Kjo metodë njihet si “Recovery”.
Fillimisht, agjentët merrnin të dhëna nga klientët për humbjet financiare, platformat ku kishin investuar dhe kompanitë me të cilat kishin bashkëpunuar.
Më pas, rastet u kaloheshin personave që prezantoheshin si “ekspertë”, të cilët vijonin komunikimin me viktimat dhe përpiqeshin t’i bindnin se paratë e tyre mund të riktheheshin.
Sipas Prokurorisë, K.S dyshohet se organizonte dhe koordinonte aktivitetin, ndërsa F.K dyshohet se kishte rol në vijimin e komunikimeve me klientët.
Në lidhje me E.A Prokuroria pretendon se ai kishte dijeni për natyrën e aktivitetit dhe nuk e kishte kallëzuar atë. Arapi i ka mohuar akuzat, duke deklaruar se kishte shkuar në ambient vetëm për të takuar Sulejmenin.
Në përfundim të hetimeve, Prokuroria ka kërkuar dërgimin në gjyq të tre personave. Çështja tashmë do të shqyrtohet nga gjykata.
Në përputhje me ligjin, të pandehurit konsiderohen të pafajshëm deri në një vendim gjyqësor të formës së prerë.
