Një kërcënim për shpërthim ka alarmuar një karburant në Dibër mesditën e 2 tetorit, pasi një 21-vjeçar dyshohet se ka vendosur një pajisje të sajuar dhe ka kërkuar 50 mijë euro në këmbim të mosaktivizimit të saj.
Sipas të dhënave paraprake, i riu kishte vendosur në një kuti një ekran, tela dhe pjesë elektronike, duke krijuar pamjen e një bombe të telekomanduar. Më pas, ai dyshohet se ka kërcënuar se do ta shpërthente pajisjen nëse nuk i jepej shuma e kërkuar në kriptomonedha.
Ngjarja ka vënë në alarm punonjësit e karburantit, ndërsa policia ka nisur menjëherë hetimet për identifikimin e autorit.
21-vjeçari është identifikuar dhe arrestuar brenda pak orësh. Gjatë ndërhyrjes, specialistët e xhenios së RENEA-s kanë kontrolluar kutinë dhe kanë konstatuar se ajo nuk përmbante lëndë shpërthyese.
Pajisja rezultoi të ishte e improvizuar me qëllim krijimin e një kërcënimi të rremë dhe marrjen e shumës së parave.
Materialet i janë referuar autoriteteve kompetente për vijimin e procedurave dhe përcaktimin e plotë të përgjegjësisë së 21-vjeçarit.
Njoftimi i Policisë:
Finalizohet operacioni policor i koduar “Kërcënimi”.
Vendosi një pajisje të dyshimtë dhe kërcënoi për shpërthimin e saj, në këmbim të 50 000 eurove. Policia zbardh brenda pak orëve ngjarjen, identifikon dhe vë në pranga autorin e dyshuar.
Më datë 02.10.2026, shërbimet e Komisariatit të Policisë Dibër, në bashkëpunim me Sektorin për Hetimin e Krimeve të Rënda dhe shërbimet Operacionale në DVP Dibër, finalizuan operacionin policor të koduar “Kërcënimi”.
Si rezultat i reagimit të menjëhershëm dhe hetimit intensiv, brenda pak orësh u bë i mundur identifikimi, kapja dhe arrestimi në flagrancë i shtetasit E. K., 21 vjeç, i dyshuar për veprën penale “Shtrëngimi me anë të kanosjes ose dhunës për dhënien e pasurisë”.
Pas mbërritjes së forcave speciale xheniere të RENEA-s, u krye hapja dhe kontrolli i kutisë, nga ku rezultoi se brenda saj nuk kishte lëndë shpërthyese.
Nga hetimet e kryera rezultoi se ky shtetas dyshohet se, rreth orës 14:30, në ambientet e një karburanti në pronësi të shtetasit Z. Sh., kishte vendosur një kuti të dyshimtë, mbi të cilën ndodheshin një ekran, pjesë elektronike dhe tela, duke krijuar dyshimin se bëhej fjalë për një pajisje shpërthyese të telekomanduar.
Mbi kuti ishte vendosur një letër kërcënuese, përmes së cilës kërkohej pagesa e shumës prej 50 000 eurosh, në formën e një gjobe. Pagesa kërkohej të kryhej në kriptomonedha, përmes një pike këmbimi të kriptomonedhave, në adresën e përcaktuar nga autori.
Në letër, autori kërcënonte se kutia do të shpërthente nëse pagesa nuk kryhej brenda afatit të përcaktuar prej tij, nëse kutia do të lëvizte ose nëse do të njoftohej Policia apo persona të tjerë.
Gjithashtu, ai pretendonte se kutia përmbante lëndë plasëse C4, ishte e pajisur me sensorë lëvizjeje dhe telekomandim dhe se ambienti monitorohej me kamera.
Nën drejtimin e Prokurorisë, vijon puna për dokumentimin e plotë të rrethanave të ngjarjes dhe identifikimin e personave të tjerë që mund të jenë përfshirë.
Materialet procedurale iu referuan Prokurorisë Dibër, për veprime të mëtejshme.
