Pas më shumë se katër vitesh luftë, Rusia po përballet me një problem që as miliardat e Kremlinit nuk po e zgjidhin dot: mungesën e ushtarëve.
Pavarësisht bonuseve që arrijnë deri në 80 mijë dollarë për rekrutët e rinj dhe ofertave për shlyerjen e borxheve, numri i personave që po regjistrohen për të luftuar në Ukrainë ka rënë ndjeshëm gjatë këtij viti. Analistët paralajmërojnë se Moska po humbet më shumë ushtarë sesa po arrin të zëvendësojë.
Ndërkohë, lufta po rëndon gjithnjë e më shumë ekonominë ruse. Fabrikat ushtarake po punojnë me kapacitet maksimal, ndërsa mungesa e fuqisë punëtore po prek pothuajse çdo sektor të vendit.
Në anën tjetër, Ukraina po fiton terren falë teknologjisë dhe përdorimit masiv të dronëve, duke shkaktuar humbje të konsiderueshme në radhët e forcave ruse. Sipas ekspertëve, kjo po ndryshon gradualisht balancën në fushëbetejë.
Teksa Kremlini përpiqet të mbajë ritmin e luftës, gjithnjë e më shumë pyetje po ngrihen nëse Rusia do të jetë në gjendje të vazhdojë të mbështetet te avantazhi i saj tradicional: numri i madh i njerëzve. Nëse trendi aktual vazhdon, Moska mund të detyrohet të marrë vendime të vështira dhe jo popullore për të mbushur radhët e ushtrisë.
