Një shtetas egjiptian është arrestuar nga Policia e Tiranës, i dyshuar për organizimin e transportimit të emigrantëve të paligjshëm drejt vendeve të Bashkimit Evropian.
Operacioni policor i koduar “Organizatori” u finalizua nga Seksioni për Hetimin e Trafiqeve, pas informacioneve të siguruara në rrugë operative.
Sipas Policisë, në pranga ra A. H., 34 vjeç, banues në Krujë, i cili u kap në flagrancë në autostradë, pranë Rinasit, ndërsa transportonte drejt Shkodrës një shtetas egjiptian.
Nga hetimet paraprake dyshohet se 34-vjeçari organizonte, kundrejt pagesës, transportimin e shtetasve të huaj, kryesisht nga Egjipti, të cilët synonin të kalonin në mënyrë të paligjshme kufijtë shqiptarë me destinacion vendet e Bashkimit Evropian.
Për të shmangur kontrollet policore, ai dyshohet se i transportonte emigrantët një nga një, duke ulur kështu dyshimet gjatë lëvizjes.
Gjatë operacionit, policia sekuestroi edhe telefonin celular të të arrestuarit, ndërsa hetimet vijojnë për dokumentimin e plotë të aktivitetit kriminal dhe identifikimin e personave të tjerë të përfshirë.
Materialet procedurale i janë referuar Prokurorisë së Tiranës për veprime të mëtejshme.
