Drejtori i Përgjithshëm i Burgjeve, Adriatik Kupi, ka dhënë dorëheqjen nga detyra pas shtatë muajsh në drejtimin e këtij institucioni. Lajmin e ka bërë të ditur vetë Kupi përmes një reagimi publik, ku ka renditur sfidat e përballuara gjatë kësaj periudhe dhe objektivat që ka pasur në drejtimin e sistemit penitenciar.
Në mesazhin e lamtumirës, Kupi e cilëson periudhën në krye të Drejtorisë së Përgjithshme të Burgjeve si të vështirë, duke theksuar se gjatë këtyre muajve është përballur me probleme që kërkonin ndërhyrje të menjëhershme, vendime të vështira dhe përgjegjësi të mëdha.
Ai bën të ditur se puna e tij është përqendruar te forcimi i sigurisë, përmirësimi i administrimit dhe modernizimi i sistemit penitenciar. Ndër prioritetet e përmendura janë gjithashtu rritja e përgjegjshmërisë, mbështetja e profesionalizmit të punonjësve dhe përmirësimi i kushteve për personat që vuajnë dënimin.
Kupi është ndalur edhe te rëndësia e respektimit të të drejtave të personave të dënuar, transparencës dhe krijimit të mundësive për rehabilitimin e tyre dhe rikthimin në shoqëri. Sipas tij, këto parime kanë qenë udhërrëfyes gjatë ushtrimit të detyrës.
Një pjesë të reagimit ia ka kushtuar kritikave dhe kundërshtimeve me të cilat është përballur gjatë kësaj periudhe. “Ka pasur edhe kritika, kundërshtime dhe gurë të hedhur mbi këtë punë”, shkruan Kupi, duke shtuar se është përpjekur t’i dëgjojë kritikat dhe të vijojë punën pavarësisht pengesave.
Në fund të mesazhit, ai ka falënderuar Ministrinë e Drejtësisë, në mënyrë të veçantë ministrin Toni Gogu, si dhe drejtuesit, punonjësit e sistemit penitenciar dhe bashkëpunëtorët e tij për mbështetjen gjatë kësaj periudhe.
Kupi shprehet se largohet me respekt për përgjegjësinë që i është besuar dhe me dëshirën që puna e nisur të vijojë për ndërtimin e një sistemi penitenciar më të sigurt, më të drejtë dhe më njerëzor.
