Banorët e Orikumit dhe Dukatit kanë protestuar këtë të hënë në zonën e plazhit të Orikumit, duke kundërshtuar ndërtimet që, sipas tyre, rrezikojnë pronat që pretendojnë se u përkasin. Ata kanë paralajmëruar përshkallëzim të protestave, duke rikujtuar edhe përplasjet e vitit 2009.
Në qendër të konfliktit janë rreth 700 hektarë tokë në zonën bregdetare të Orikumit. Banorët pretendojnë se këto sipërfaqe i kanë përfituar përmes ligjit 7501 dhe kundërshtojnë pretendimet e personave të tjerë që synojnë të ndërtojnë në këtë zonë.
Gjatë protestës, banorët kanë bllokuar për disa momente rrugën që të çon drejt plazhit të Orikumit, duke kërkuar respektimin e të drejtave të tyre të pronësisë.
Sipas protestuesve, një ditë më parë në zonë kanë mbërritur persona që synonin të nisnin punimet për ndërtimin në tokat që ata pretendojnë se janë të tyret. Banorët kanë deklaruar se nuk do të lejojnë hyrjen e fadromave apo mjeteve të tjera për nisjen e ndërtimeve.
Gjatë reagimit të tyre, ata kanë paralajmëruar rikthimin e protestave të vitit 2009, kur kundërshtimi ndaj ndërhyrjeve në zonë u shoqërua me përplasje me policinë.
Përplasja për pronësinë e tokave mbetet e pazgjidhur, ndërsa çështja kërkon sqarim ligjor për të përcaktuar të drejtat mbi sipërfaqet e kontestuara. Banorët paralajmërojnë se do të vijojnë kundërshtimin ndaj çdo ndërhyrjeje që, sipas tyre, cenon pronat e tyre.
