Për të tretën herë, qytetarët e Patosit kanë dalë në protestë kundër propozimit për shkrirjen e Bashkisë Patos dhe bashkimin e saj me Bashkinë Fier, në kuadër të reformës së re territoriale.
Protestuesit janë mbledhur para bashkisë, duke kërkuar që Patosi të vijojë të funksionojë si njësi e veçantë administrative. Ata kundërshtojnë ndryshimin e statusit të qytetit dhe thonë se Patosi i plotëson kriteret për të qenë bashki më vete.
Një nga argumentet kryesore të qytetarëve lidhet me industrinë e naftës. Sipas tyre, Patosi ka të ardhura dhe një aktivitet ekonomik të rëndësishëm, të lidhur prej dekadash me industrinë e naftës.
Banorët shqetësohen gjithashtu për pasojat që mund të sjellë largimi i shërbimeve administrative nga qyteti. Ata thonë se, nëse bashkia shkrihet me Fierin, qytetarët do të detyrohen të udhëtojnë drejt Fierit për dokumente dhe shërbime të ndryshme.
“Patosi ka historinë, ekonominë dhe të ardhurat e veta. Nuk është e drejtë që qytetarët të detyrohen të shkojnë në Fier për shërbime që sot i marrin këtu”, u shpreh një prej protestuesve.
Sipas banorëve, kjo situatë do të ishte veçanërisht e vështirë për të moshuarit, të cilët do të duhet të përshkojnë distancën drejt Fierit edhe për shërbime të thjeshta administrative.
Protestuesit kanë paralajmëruar se nuk do të ndalen dhe do të vijojnë kundërshtimin e reformës territoriale, duke kërkuar që Patosi të mbetet bashki më vete dhe që mendimi i qytetarëve të merret në konsideratë përpara çdo vendimi përfundimtar.
