Ka nisur në Gjykatën e Sarandës seanca për caktimin e masës së sigurisë për 11 personat e arrestuar në lidhje me vrasjen e 20-vjeçarit portugez, Luis Mendes.
Seanca vijon prej rreth një ore, ndërsa të arrestuarit janë shoqëruar në gjykatë nën masa të rrepta sigurie nga forcat “Shqiponja” të Sarandës dhe efektivë të FNSH-së.
Sokrat Vata, i dyshuari kryesor për ngjarjen, akuzohet për vrasje. Ndërkohë, ndaj 10 personave të tjerë janë ngritur akuza të ndryshme, përfshirë “përkrahje të autorit të krimit”, “moskallëzim të krimit” dhe “mosmarrje të masave për ndërprerjen e paligjshmërisë”.
Gjykata pritet të vendosë masat e sigurisë për secilin prej 11 të arrestuarve, në varësi të rolit dhe akuzave që rëndojnë ndaj tyre.
Vrasja e 20-vjeçarit portugez ndodhi në kompleksin luksoz “Principote”, ndërsa ngjarja tronditi qytetin në kulmin e sezonit turistik. Hetimet vijojnë për të zbardhur plotësisht dinamikën e krimit dhe përgjegjësinë e personave të përfshirë.
