Një ngjarje e rëndë është regjistruar paraditen e sotme në zonën e Porto Palermos, në Himarë, ku një 65-vjeçar ka humbur jetën pas shpërthimit të një lënde plasëse që dyshohet se po përdorej për peshkim të paligjshëm.
Sipas të dhënave paraprake, burri është dëmtuar rëndë në momentin kur lënda plasëse ka shpërthyer në dorën e tij. Ai është transportuar me urgjencë drejt Qendrës Shëndetësore Himarë për të marrë ndihmën e parë mjekësore, por nuk ka mundur t’u mbijetojë plagëve të marra dhe ka ndërruar jetë.
Në vendngjarje kanë mbërritur shërbimet e Policisë dhe grupi hetimor, të cilët kanë nisur veprimet për të sqaruar plotësisht rrethanat e ngjarjes. Hetimet po zhvillohen nën drejtimin e Prokurorisë.
Njoftimi i policisë:
Himarë/Informacion paraprak
Rreth orës 09:00, në afërsi të zonës së Porto Palermos, dyshohet se shtetasi P. M., 65 vjeç, gjatë peshkimit të paligjshëm me lëndë plasëse (dinamit), është dëmtuar nga shpërthimi i lëndës plasëse.
65-vjeçari u transportua për ndihmë mjekësore në Qendrën Shëndetësore Himarë, por, si pasojë e dëmtimeve të marra, humbi jetën.
Grupi hetimor, nën drejtimin e Prokurorisë, po vijon veprimet për zbardhjen dhe dokumentimin e plotë të rrethanave të ngjarjes.
