Kryeministri Edi Rama ka reaguar sërish për protestat që po zhvillohen prej disa javësh në Tiranë, duke deklaruar se pas tyre veprojnë individë dhe organizata që, sipas tij, nuk kanë interes për zgjidhjen e problemeve, por për vazhdimin e tensioneve.
Gjatë podkastit të tij “Flasim”, kreu i qeverisë tha se shqetësimet e qytetarëve janë të kuptueshme, por theksoi se ato nuk duhet të shfrytëzohen nga grupe që synojnë të mbajnë të ndezur klimën e përplasjes dhe pakënaqësisë.
Sipas Ramës, ekzistojnë edhe aktorë jashtë Shqipërisë që, sipas tij, ndikojnë në nxitjen e situatës, duke ushqyer zemërimin dhe duke mos qenë të interesuar që problemet të marrin zgjidhje.
“Këta njerëz kanë nevojë që zgjidhja të mos vijë kurrë, sepse përfitojnë nga kriza dhe nga pakënaqësia e qytetarëve”, u shpreh kryeministri.
Në të njëjtën bisedë, Rama u ndal edhe te funksionimi i Bashkisë së Tiranës, duke deklaruar se institucioni nuk po punon me kapacitet të plotë, pasi kryebashkiaku ndodhet në burg.
Deklaratat e kryeministrit vijnë në një kohë kur protestat qytetare në kryeqytet vijojnë prej javësh, me kërkesa që lidhen me çështje politike, mjedisore dhe sociale.
