Foto Ilustruese
Forca Detare dhe Ajrore po zhvillojnë një stërvitje të përbashkët në zonën e Gjirit të Dukatit dhe Karaburunit, duke përfshirë manovra operacionale dhe qitje luftarake bregdetare me anije të armatosura.
Sipas njoftimit zyrtar aktiviteti ushtarak do të zhvillohet gjatë datave 23 dhe 24 qershor 2026 në zonën Bristan–Kepi i Gjuhëzës, një nga hapësirat strategjike të bregdetit jugor të vendit.
Për garantimin e sigurisë gjatë zhvillimit të stërvitjes, autoritetet kanë vendosur ndalimin e përkohshëm të lundrimit për të gjitha mjetet detare civile në perimetrin ku do të kryhen manovrat dhe qitjet ushtarake.
Sipas njoftimit, zona e sigurisë përfshin koordinatat:
40°25’00” V – 19°18’00” L
40°25’00” V – 19°12’00” L
40°20’00” V – 19°15’00” L
40°20’00” V – 19°22’00” L
Autoritetet u bëjnë thirrje peshkatarëve, operatorëve turistikë dhe drejtuesve të mjeteve lundruese që të respektojnë kufizimet e vendosura dhe të shmangin hyrjen në zonën e stërvitjes deri në përfundimin e aktivitetit.
Këto manovra janë pjesë e programeve të rregullta të gatishmërisë dhe koordinimit mes strukturave të Forcave të Armatosura, me fokus rritjen e kapaciteteve operacionale dhe reagimin në situata të ndryshme në hapësirën detare dhe ajrore.
