Një ngjarje e rëndë trondit mbrëmjen e sotme qytetin bregdetar të Ksamilit, ku një aksident detar i ka marrë jetën një të riu 22-vjeçar. Viktima është identifikuar si Albiano Kreçi, banor i Ksamilit.
Sipas informacioneve paraprake, aksidenti ndodh rreth orës 18:30, kur mjeti lundrues që drejtohej nga i riu përplaset me një skaf të Policisë Kufitare të Sarandës. Përplasja shkakton alarm të menjëhershëm në zonë, ndërsa forca të shumta policie dhe ekipet e emergjencës angazhohen në operacionin e shpëtimit.
Në njoftimin zyrtar, Policia bën me dije se 22-vjeçari po lundronte me një mjet tip “jet car” (makinë lundruese) dhe dyshohet se, për shkak të lundrimit me shpejtësi, është përplasur me skafin e Policisë Kufitare. Në momentin e aksidentit, skafi ndodhej i stacionuar rreth 400 metra larg bregut dhe ishte në monitorim të hapësirës detare.
Menjëherë pas ngjarjes, punonjësit e Policisë Kufitare, së bashku me drejtues të tjerë të mjeteve lundruese që ndodheshin pranë, ndërhyjnë për ta nxjerrë të riun nga deti. Ai transportohet me urgjencë drejt Spitalit të Sarandës, por fatkeqësisht nuk arrin t’u mbijetojë plagëve të marra.
Lajmi i humbjes së jetës së Albanio Kreçit sjell trishtim të madh në Ksamil, ku ai njihej nga shumë banorë si një djalë i ri i lindur dhe i rritur në qytet.
Pas aksidentit, ngrihet një grup i posaçëm hetimor dhe, në bashkëpunim me Agjencinë e Mbikëqyrjes Policore (AMP), nën drejtimin e Prokurorisë, po kryhen të gjitha veprimet procedurale për të zbardhur rrethanat e plota të ngjarjes dhe për të përcaktuar përgjegjësitë përkatëse.
Ngjarja konsiderohet si një nga aksidentet detare më të rënda të regjistruara në zonën e Ksamilit, duke rikthyer në vëmendje rëndësinë e respektimit të rregullave të sigurisë në lundrim gjatë sezonit turistik.
