Protestat në Tiranë kanë hyrë në ditën e 12-të radhazi, me mijëra qytetarë që janë mbledhur sërish në kryeqytet për të vijuar tubimin e tyre.
Rreth orës 18:30, protestuesit u nisën nga sheshi “Skënderbej” dhe marshuan drejt Kryeministrisë, duke mbajtur në duar pankarta me mesazhe të qarta si “Edi Rama dorëhiqu” dhe “Ju erdhi fundi”.
Gjatë mbërritjes para godinës së qeverisë, turma është dëgjuar duke thirrur në kor kundër kryeministrit: “Edi Rama o tradhtar, jep dorëheqjen sa më parë”.
Protestuesit shprehen se janë të bashkuar kundër asaj që e cilësojnë si keqqeverisje, arrogancë të pushtetit dhe korrupsion të lartë në vend, duke kërkuar ndryshim të menjëhershëm politik.
Ndërkohë, protesta të ngjashme janë zhvilluar edhe në qytete të tjera si Korça dhe Gjirokastra, duke treguar se pakënaqësia është shtrirë edhe jashtë Tiranës.
Tubimet pritet të vijojnë edhe në ditët në vazhdim, ndërsa protestuesit kanë paralajmëruar se nuk do të tërhiqen nga kërkesat e tyre.
