foto ilustruese
Është nxjerrë nga thellësia e minierës së Tërnovës trupi i pajetë i minatorit 40-vjeçar Ilir Kalaveri, i cili një ditë më parë ra në një furnelë dhe u mbulua nga materiali i kromit në malin e Tërnovës, në Bulqizë.
Aksidenti i rëndë ndodhi mesditën e së shtunës, teksa 40-vjeçari, banues në Klos dhe i punësuar si minator në një subjekt privat, ra në furnelë gjatë procesit të punës.
Pas ngjarjes, grupet e kërkim-shpëtimit, shërbimet e Policisë dhe personeli teknik i subjektit minerar vijuan për orë të tëra kërkimet për lokalizimin dhe nxjerrjen e minatorit.
Fatkeqësisht, pas kërkimeve intensive, ekipet arritën të gjejnë dhe nxjerrin trupin e pajetë të 40-vjeçarit, i cili kishte mbetur i bllokuar nga materiali i kromit.
Njoftimi i Policisë:
“Bulqizë/Informacion shtesë-Në vijim të informacionit paraprak të dhënë ditën e djeshme, bëjmë me dije se, pas kërkimeve intensive të kryera nga ekipet e kërkim-shpëtimit, shërbimet e Policisë dhe personeli teknik i subjektit minerar ku ndodhi aksidenti, u bë e mundur gjetja dhe nxjerrja e trupit të pajetë të shtetasit I. K., 40 vjeç, banues në Klos, i cili kishte rënë në një furnel gjatë procesit të punës, në vendin e quajtur Tërnovë e Madhe, bashkia Bulqizë, dhe mbeti i bllokuar nga materiali i kromit.
Trupi i pajetë do të transportohet në Institutin e Mjekësisë Ligjore, Tiranë, për kryerjen e ekspertimit mjekoligjor.
Grupi hetimor, në drejtimin e Prokurorisë, vijon veprimet procedurale për dokumentimin dhe sqarimin e plotë të rrethanave të kësaj ngjarjeje.”
