Kryetarja e Bashkisë së Vlorës, Brunilda Mersini, është takuar këtë të mërkurë me punonjësit e sektorit të pastrimit..

Kryetarja e Bashkisë së Vlorës, Brunilda Mersini, është takuar këtë të mërkurë me punonjësit e sektorit të pastrimit, pas ankesave dhe protestave të njëpasnjëshme lidhur me kushtet e punës, vonesat në pagesa dhe mosdhënien e antidotës.

Takimi u zhvillua në ambientet e ndërmarrjes së pastrimit, ku punonjësit paraqitën shqetësimet e tyre dhe kërkuan zgjidhje konkrete për problematikat e ngritura. Ata theksuan se prej kohësh përballen me vonesa në paga dhe mungesë të pajisjeve mbrojtëse, duke e konsideruar situatën të papranueshme.

Pas bisedës me punonjësit, Mersini u shpreh për mediat se Bashkia e Vlorës është e angazhuar për të gjetur një zgjidhje sa më të shpejtë dhe të drejtë. Sipas saj, do të kryhen verifikime për situatën e pagesave, kushtet e punës dhe respektimin e të drejtave të punonjësve në këtë sektor.

Kryetarja e bashkisë deklaroi se garantimi i një shërbimi dinjitoz për qytetin dhe respektimi i të drejtave të punonjësve mbeten prioritet, ndërsa u premtoi protestuesve se shqetësimet e tyre nuk do të mbeten pa përgjigje.