Një tjetër alarm është ngritur për fatin e pronave në jug të vendit. Aktivistja Xheni Alickaj ka denoncuar publikisht atë që e cilëson si një grabitje të organizuar të tokave në zonat e Orikum, Dukat dhe Karaburun, duke akuzuar institucionet për heshtje dhe mungesë transparence.
Sipas saj, banorët e zonës po përballen prej vitesh me konflikte pronësie, falsifikime dokumentesh dhe projekte që, sipas tyre, favorizojnë interesa të fuqishme ekonomike në kurriz të komunitetit vendas. Denoncimi vjen në një kohë kur banorë të zonave të jugut kanë ngritur vazhdimisht shqetësime për tjetërsimin e pronave dhe mungesën e konsultimeve publike për projektet turistike dhe strategjike në bregdet.
Alickaj shprehet se toka në këto zona po “rrëmbehet para syve të banorëve”, ndërsa shumë familje pretendojnë se po mbeten pa prona dhe pa të drejtë zhvillimi në trojet e tyre. Ajo kërkon reagim të menjëhershëm nga SPAK dhe institucionet përgjegjëse për të hetuar çdo pretendim mbi abuzimet me pronat në vijën bregdetare.
Ndërkohë, prej kohësh komunitetet e Orikum, Dukat, Tragjasit dhe zonës së Karaburun kanë ngritur akuza për mbivendosje pronash, mungesë transparence dhe përjashtim të banorëve nga projektet që zhvillohen në bregdet.
