Kryeministri i Kosovës, Albin Kurti, ka deklaruar se zgjedhjet e parakohshme të 7 qershorit nuk ishin të nevojshme, duke theksuar se rezultati i tyre konfirmoi vullnetin e qytetarëve dhe qëndrimet e shprehura më herët nga qeveria.
Gjatë mbledhjes së parë fizike të Qeverisë pas zgjedhjeve, Kurti u shpreh se qytetarët kanë folur qartë përmes votës së tyre dhe se rezultati duhet të pranohet e të respektohet nga të gjitha palët politike.
“Kosova nuk kishte nevojë për këto zgjedhje dhe ky rezultat e dëshmon këtë. Qytetarët folën sërish qartë dhe verdikti i tyre duhet të respektohet”, deklaroi ai.
Kreu i qeverisë bëri të ditur se pas certifikimit zyrtar të rezultatit zgjedhor do të nisin diskutimet dhe procedurat për ngritjen e institucioneve të reja shtetërore.
Sipas Kurtit, fokusi i ditëve në vijim do të jetë konstituimi i legjislaturës së re të Kuvendit, formimi i qeverisë së ardhshme dhe procesi për zgjedhjen e presidentit ose presidentes së vendit.
Deklaratat e tij vijnë në një moment të rëndësishëm politik për Kosovën, ndërsa partitë politike pritet të intensifikojnë negociatat për krijimin e shumicës parlamentare dhe ndërtimin e institucioneve të reja pas zgjedhjeve.
