Nëntë persona kanë humbur jetën pasi një avion privat i tipit “Learjet 60” u rrëzua në një zonë të banuar në Florida të SHBA-së, të dielën.
Aksidenti ndodhi rreth orës 12:50 me orën lokale, pranë zonës së Cresthaven, në qarkun Palm Beach. Avioni u përplas në një rrugë me gjashtë korsi, duke shkaktuar një shpërthim të fuqishëm dhe një zjarr të madh. Sipas autoriteteve, asnjë person në tokë nuk mbeti i lënduar.
Sipas Administratës Federale të Aviacionit (FAA), avioni ishte nisur nga Austin, në Teksas, dhe kishte si destinacion Bahamasin.
Pamjet e publikuara nga vendngjarja tregojnë një krater të madh në mes të rrugës, ndërsa mbetjet e avionit u shpërndanë në zonën përreth. Përplasja shkaktoi gjithashtu dëme në infrastrukturën lokale, përfshirë rrjetin e ujësjellësit.
Sipas komunikimeve të regjistruara mes ekuipazhit dhe kontrollit ajror, pak para aksidentit pilotët raportuan turbulenca dhe probleme të lidhura me kushtet atmosferike. Në vijim, avioni nisi të humbiste lartësi me shpejtësi shumë të madhe, ndërsa ekuipazhi shpalli gjendjen e emergjencës.
Guvernatori i Floridës, Ron DeSantis, e përshkroi përplasjen si një ngjarje të rëndë, duke e krahasuar pamjen e avionit që binte me një raketë.
Pas aksidentit, autoritetet urdhëruan evakuimin e rreth 600 banorëve nga një komunitet i afërt. Rruga ku ndodhi përplasja pritet të qëndrojë e mbyllur për të paktën 30 ditë.
Administrata Federale e Aviacionit dhe Bordi Kombëtar i Sigurisë së Transportit kanë nisur hetimet për të përcaktuar shkaqet e aksidentit. Identiteti i personave që ndodheshin në avion ende nuk është bërë publik.
