Një ngjarje e rëndë është raportuar në Tiranë, ku një 12-vjeçare dyshohet se është abuzuar seksualisht nga dy të afërm të saj.
Sipas burimeve policore, në pranga kanë përfunduar një 29-vjeçar, djali i hallës së të miturës, dhe tezja e saj 32-vjeçare. Të dyshuarit, me inicialet K.B. dhe D.S., akuzohen për veprat penale “marrëdhënie seksuale me të mitur”, “incest” dhe “pornografi”.
Rasti është zbuluar pasi autoritetet e shkollës kanë sinjalizuar policinë, pas konstatimit të materialeve intime në telefonin e 12-vjeçares.
Pas marrjes së informacionit, policia ka njoftuar prindërit e të miturës dhe ka angazhuar një psikologe për trajtimin e rastit. Vajza është marrë në pyetje në praninë e personave përgjegjës, ndërsa nga dëshmia e saj kanë dalë dyshime për abuzimin e pretenduar.
Në vijim të veprimeve hetimore, policia ka arrestuar dy personat e dyshuar, ndërsa materialet e mbledhura i janë referuar organit të prokurorisë për vijimin e hetimeve.
Autoritetet po vijojnë punën për të dokumentuar plotësisht rrethanat e ngjarjes, ndërsa të dyshuarit do të përballen me procedurat ligjore për veprat penale për të cilat akuzohen.
Për shkak të moshës së viktimës, nuk bëhen publike të dhëna që mund të çojnë në identifikimin e saj.
Shënim: Për personat e arrestuar bëhet fjalë për dyshime dhe akuza të ngritura nga autoritetet. Përgjegjësia penale përcaktohet vetëm me vendim gjyqësor të formës së prerë.
