Gjykata e Apelit në Bolonjë ka vendosur të ulë nga 17 në 15 vite burg dënimin për të riun që ishte 15 vjeç në momentin e ngjarjes, i dënuar për vdekjen e 13-vjeçares shqiptare Aurora Tila.
Ngjarja e rëndë ndodhi më 25 tetor 2024 në Piacenza të Italisë, ku Aurora humbi jetën pasi u hodh nga një ballkon.
Vendimi i Apelit ka shkaktuar reagime të forta nga familjarët e 13-vjeçares, të cilët kanë shprehur zhgënjimin e tyre për uljen e dënimit.
Avokati Emilio Malaspina, i cili përfaqëson nënën e viktimës, Morena Corbellini, ka deklaruar se familja është veçanërisht e zhgënjyer edhe nga qëndrimi i Zyrës së Prokurorit të Përgjithshëm lidhur me uljen e dënimit.
Sipas avokatit, Aurora ishte vetëm 13 vjeçe në momentin e vdekjes dhe rasti i saj ka shkaktuar reagime të shumta në Itali.
Pas vendimit, nëna e vajzës ka reaguar ashpër, duke kritikuar mënyrën se si sistemi i drejtësisë po trajton raste të tilla.
Ajo ka shprehur shqetësimin se dënimet që konsiderohen të lehta mund të mos kenë efektin e pritshëm në parandalimin e rasteve të ngjashme.
Çështja e Aurora Tilës ka tërhequr vëmendje të gjerë në Itali që prej ngjarjes së tetorit 2024, ndërsa vendimi i fundit i Gjykatës së Apelit në Bolonjë ka rikthyer debatin mbi trajtimin ligjor të rasteve të dhunës ndaj grave dhe vajzave të mitura.
Familja e 13-vjeçares vijon të kundërshtojë vendimin dhe kërkon një trajtim më të ashpër të përgjegjësisë për vdekjen e vajzës.
