Një aksident i rëndë rrugor është regjistruar paraditen e kësaj të premteje në aksin nacional Fier–Shegan, pranë zonës së njohur si “Pushimi i Shoferit”, në kryqëzimin e fshatit Toshkëz.
Sipas informacioneve paraprake, një automjet tip Benz është përplasur me një furgon, ndërsa si pasojë e goditjes së fortë, furgoni ka dalë nga rruga dhe ka përfunduar në kanal.
Nga aksidenti ka mbetur i plagosur rëndë një i moshuar, i cili është transportuar me urgjencë në Spitalin e Lushnjës. Burime spitalore bëjnë me dije se ai ndodhet në gjendje të rëndë shëndetësore.
Në vendngjarje kanë mbërritur shërbimet e Policisë Rrugore, të cilat po dokumentojnë rrethanat e aksidentit dhe po punojnë për disiplinimin e trafikut në zonë.
Aksi rrugor Fier–Shegan, pranë “Pushimit të Shoferit”, konsiderohet një nga segmentet me qarkullim të lartë, ku prej kohësh janë ngritur shqetësime për sigurinë rrugore. Autoritetet pritet të zbardhin shkaqet e plota të aksidentit.
