Një aksident rrugor është regjistruar gjatë natës në zonën e Çakrezit, në Gramsh, ku një çift bashkëshortësh ka mbetur i plagosur pasi motori me të cilin udhëtonin u përplas pas daljes së papritur të një kali në rrugë.
Sipas informacioneve paraprake, kafsha u ka prerë rrugën drejtuesit të motorit, i cili ka humbur kontrollin e mjetit, duke bërë që ai dhe bashkëshortja e tij të rrëzohen në asfalt.
Pas njoftimit, në vendngjarje kanë mbërritur shërbimet e Policisë së Gramshit dhe një ambulancë, të cilat u kanë dhënë ndihmën e parë të plagosurve dhe i kanë transportuar drejt Spitalit të Gramshit për trajtim mjekësor.
Fatmirësisht, deri më tani nuk raportohet që të plagosurit të jenë në rrezik për jetën, ndërsa policia ka nisur hetimet për të sqaruar plotësisht rrethanat e aksidentit.
