Një ngjarje e pazakontë është regjistruar këtë të hënë në Vlorë, ku një 36-vjeçar është arrestuar nga policia pasi dyshohet se i vuri flakën një mjeti të tonazhit të rëndë dhe më pas qëlloi me armë gjahu në ajër.
Sipas informacioneve paraprake, ngjarja ka ndodhur në zonën e Panajasë, ku një kompani po kryente punime për rehabilitimin e rrugës. Dyshohet se shtetasi Egli Aliraj, në gjendje të dehur, ka spërkatur me lëndë djegëse një mjet të rëndë të kompanisë dhe më pas i ka vënë flakën.
Burime nga zona bëjnë me dije se 36-vjeçari është konfliktuar edhe me persona të tjerë në fshat, ndërsa më pas ka marrë një armë gjahu të llojit çifte dhe ka qëlluar në ajër, duke shkaktuar alarm te banorët.
Pas njoftimit të marrë nga qytetarët, forcat e Policisë kanë mbërritur në vendngjarje dhe kanë bërë të mundur arrestimin e autorit të dyshuar.
Grupi hetimor po punon për zbardhjen e plotë të rrethanave të ngjarjes, ndërsa pritet të përcaktohen edhe motivet që çuan në këtë akt.
