Rebelët Huthi të mbështetur nga Irani kanë marrë përgjegjësinë për një sulm me raketa të lëshuara nga Jemeni në drejtim të Izraelit, duke shënuar një tjetër përshkallëzim të tensioneve në Lindjen e Mesme.
Në një deklaratë të publikuar të hënën, grupi Huthi bëri të ditur se kishte lëshuar një breshëri raketash ndaj objektivave që i cilësoi si “objektiva të ndjeshme armike izraelite”, duke pretenduar se sulmet kanë goditur me sukses objektivat e synuara.
Ndërkohë, Forcat Mbrojtëse të Izraelit (IDF) njoftuan se sistemet e mbrojtjes ajrore kanë interceptuar me sukses një raketë të lëshuar nga territori i Jemenit.
Në të njëjtën deklaratë, rebelët Huthi shpallën ndalimin e plotë të lundrimit detar izraelit në Detin e Kuq, duke paralajmëruar se çdo lëvizje që konsiderohet e lidhur me Izraelin do të trajtohet si objektiv ushtarak.
Zhvillimi vjen në një kohë kur situata në rajon mbetet e tensionuar. Vetëm një ditë më parë, Irani lëshoi raketa drejt Izraelit, në atë që konsiderohet sulmi i parë i tillë që nga hyrja në fuqi e armëpushimit të brishtë në fillim të muajit prill.
Sipas ushtrisë izraelite, sirenat e alarmit u aktivizuan në disa zona të vendit pas identifikimit të raketave të lëshuara drejt territorit izraelit. IDF njoftoi gjithashtu se gjatë së hënës u identifikua një valë e re raketash nga Irani, ndërsa sistemet mbrojtëse vijuan operacionet për neutralizimin e kërcënimeve.
Përshkallëzimi i sulmeve dhe kërcënimeve reciproke po shton shqetësimet për një zgjerim të konfliktit në rajon, ndërsa përpjekjet diplomatike për uljen e tensioneve vijojnë të përballen me vështirësi.
