Protesta kundër qeverisë ka vijuar edhe sot, duke shënuar ditën e 53-të radhazi. Qytetarët u mblodhën fillimisht në sheshin “Skënderbej”, përpara se të marshonin drejt Kryeministrisë.
Gjatë fjalimeve, protestuesit kanë përsëritur kërkesën për dorëheqjen e kryeministrit Edi Rama dhe u kanë bërë thirrje institucioneve të drejtësisë që të hetojnë pretendimet e ngritura prej tyre.
“Hetoni Ramën, zbatoni ligjin”, është shprehur një prej protestuesve gjatë tubimit.
Në protestë, disa të rinj janë shfaqur me maska që paraqisnin fytyrat e politikanëve të Partisë Socialiste dhe Partisë Demokratike. Ata kanë improvizuar një lojë bixhozi, duke përdorur hartën e Shqipërisë, si simbolikë kundër propozimeve që lidhen me reformën territoriale.
Pas përfundimit të fjalimeve, protestuesit pritet të vijojnë marshimin drejt Kryeministrisë, në të njëjtën formë si në ditët e mëparshme të protestës.
