Një operacion i gjerë policor është duke u zhvilluar prej orëve të para të mëngjesit në qytetin e Vlorës dhe në disa fshatra të zonës së Lumit të Vlorës.
Aksioni po drejtohet nga Drejtoria Vendore e Policisë Vlorë dhe përfshin kontrolle në banesa, ambiente të ndryshme dhe persona të dyshuar, në kuadër të luftës kundër veprimtarive të paligjshme.
Sipas informacioneve paraprake, deri tani janë shoqëruar dhe ndaluar të paktën 5 persona. Gjatë kontrolleve janë sekuestruar edhe armë, ndërsa hetuesit po punojnë për të dokumentuar plotësisht rastet dhe për të verifikuar lidhjet e mundshme të të ndaluarve me aktivitete të tjera kriminale.
Burime pranë policisë bëjnë me dije se operacioni vijon ende në terren dhe se detaje të tjera nuk janë bërë ende publike. Pas përfundimit të aksionit pritet një njoftim zyrtar, ku do të bëhen të ditura rezultatet e plota dhe objektivat e operacionit.
