Dhjetëra përfaqësues të bizneseve në Vlorë janë mbledhur këtë të mërkurë para Bashkisë, duke kërkuar një takim urgjent me kryetaren e qytetit. Shkak i protestës janë aksionet e prishjeve të paralajmëruara nga institucionet, pikërisht në prag të sezonit veror.
Bizneset, të mbështetura edhe nga Shoqata Turistike Rajonale Aulona (ARTA), kanë paraqitur një kërkesë zyrtare ku kërkojnë shtyrjen e afatit të ndërhyrjeve deri në fund të shtatorit. Sipas tyre, çdo aksion në këtë periudhë rrezikon drejtpërdrejt aktivitetin ekonomik dhe sezonin turistik, nga i cili varet një pjesë e madhe e të ardhurave në qytet.
Ata shprehen se strukturat që rrezikojnë të prishen – si pergolat, tendat e diellit dhe ambientet shtesë – janë investime të bëra ndër vite dhe pjesë thelbësore e shërbimit për turistët.
Protestuesit theksojnë se nuk janë kundër zbatimit të ligjit, por kërkojnë transparencë dhe dialog me institucionet përpara se të ndërmerren veprime që mund t’i çojnë drejt falimentimit.
“Kemi ardhur të protestojmë që të mos na prishet biznesi në këtë sezon. Sezoni hapet për pak ditë dhe ndërkohë na thuhet se do të ketë prishje. Duam një zgjidhje nga kryetarja ose nga kryeministri. Nëse ka një projekt, të paktën të informohemi. Kemi punonjës që varen nga ne. Sot jemi këtu, nesër do të jemi edhe më shumë”, u shpreh një prej bizneseve pjesëmarrëse.
Bizneset paralajmërojnë përshkallëzim të protestës nëse nuk marrin një përgjigje konkrete nga autoritetet, ndërsa kërkesa e tyre kryesore mbetet e njëjtë: shtyrja e prishjeve deri pas përfundimit të sezonit turistik.
