Kryeministri Edi Rama ka ironizuar blogerët dhe influencerat gjatë një takimi të zhvilluar në Elbasan, duke i akuzuar se përfitojnë të ardhura pa paguar taksat dhe se nuk kanë moral për t’i dhënë leksione qeverisë lidhur me korrupsionin.
Gjatë fjalës së tij, Rama përdori tone ironike dhe humoristike, duke imituar mënyrën se si, sipas tij, disa figura të njohura në rrjetet sociale komentojnë zhvillimet politike dhe akuzojnë qeverinë për korrupsion.
“Mos na jepni leksione për korrupsionin, merrni para e s’paguani taksa”, u shpreh kryeministri, duke shkaktuar reagime dhe të qeshura mes të pranishmëve në sallë.
Komentet e Ramës vijnë në një kohë kur roli i influencerave dhe blogerëve në debatin publik është rritur ndjeshëm, me shumë prej tyre që shprehin hapur qëndrime kritike ndaj politikës dhe institucioneve.
Nuk është hera e parë që Rama përplaset verbalish me figura publike të rrjeteve sociale, por këtë herë ai zgjodhi t’i vendosë në qendër të kritikave për çështjen e taksave dhe pretendimet për korrupsion.
